ရန်ကုန်ပြည်ပြည်ဆိုင်ရာလေဆိပ်အသုံးပြသူ ပြည်တွင်းခရီးသည်များ ပိုမိုအဆင်ပြေချောမွေ့သော ဝန်ဆောင်မှုများကို အသုံးပြုနိုင်ရန် Terminal 3 ရှိ Gate 4 တွင် အမိုးအကာအသစ်တစ်ခု တိုးချဲ့ဆောက်လုပ်သွားမှာဖြစ်တာကြောင့် ဩဂုတ် ၄ ရက်မှ ၁၀ ရက်အထိ Gate 4 အား ယာယီပိတ်ထားမည် ဖြစ်ကြောင်း လေဆိပ်ဝန်ဆောင်မလုပ်ငန်းများအား တာဝန်ယူဆောင်ရွက်နေသည့် Yangon Aerodrome Company Limited(YACL) ၏ထုတ်ပြန်ကြေညာချက်အရ သိရသည်။
ထိုသို့ တိုးချဲ့လုပ်ငန်းများ လုပ်ဆောင်နေစဉ်ကာလအတွင်း လေဆိပ်အသုံးပြုသူ ခရီးသည်များအနေဖြင့် Gate 1 နှင့် Gate 2 ကို ဝင်/ထွက်ပေါက်အဖြစ်လည်းကောင်း၊ Gate 3 ကို ထွက်ပေါက်အဖြစ်လည်းကောင်း အသုံးပြုသွားရန်နှင့် ခရီးသည်များသွားလာရေး လွယ်ကူအဆင်ပြေစေရန် ကားရပ်နားရာနေရာနှင့် T3 ပလက်ဖောင်းများအကား အမိုးပါ လျှောက်လမ်းတစ်ခု ယာယီစီစဉ်ထားကြောင်း YACL ၏ကြေညာချက်တွင် ဖော်ပြထားသည်။
ခရီးသည်များ အနေနဲ့ လတ်တေလာကာလအတွင်း အဆင်မပြေမှုများပေါ်ပေါက်ခဲ့ပါက သည်းခံပေးပါရန်နှင့် လေဆိပ်အတွင်း ချမှတ်ထားသောကျန်းမာရေးကာကွယ်မှု အစီအမံများကို ဆက်လက်လိုက်နာပေးကြရန်တိုက်တွန်းလိုကြောင်း၊ YACL အနေဖြင့် လေဆိပ်အသုံးပြုသူခရီးသည်များနှင့် လေဆိပ်ဝန်ထမ်းများအားလုံး၏ ကျန်းမာရေး၊ လုံးဝ စိတ်ချမှုရှိရေးစသည်တို့အတွက် ဦးစားပေးလုပ်ဆောင်နေပီး လေဆိပ်ဝန်ဆောင်မှုလုပ်ငန်းများကို ထိရောက်မြန်ဆန်မှုရှိအောင် အစဉ်မပြတ်ကြိုးပမ်းလျက်ရှိကြောင်းထုတ်ပြန်ချက်တွင် ဖော်ပြထားပါသည်။
