Local Industry

ကလေးမြို့ လေယာဉ် အဝင်အထွက်များ Omicron ကြောင့် ရက်အကန့်အသတ်မရှိ ပိတ်ထား

၂၀၂၁ ခုနှစ် ဒီဇင်ဘာလ ၆ ရက်မှ စ၍ ကလေးမြို့ လေဆိပ်တွင် လေယာဉ် အဝင်အထွက်များ ရက်အကန့်အသတ်မရှိပိတ်ထား ပါတယ်။

ဗီဇပြောင်း Omicron ကိုဗစ်ပိုးသစ် ကူးစက်သူတွေ အိန္ဒိယနိုင်ငံမှာပါ ရှိနေပြီမို့ သူနဲ့ နယ်နိမိတ်ချင်း ထိစပ်နေတဲ့ စစ်ကိုင်းတိုင်း ကလေးမြို့ကနေ ပျံသန်းပြေးဆွဲတဲ့ ပြည်တွင်းလေကြောင်း ခရီးစဉ်တွေ အားလုံးကို ရက်အကန့်အသတ်မရှိ ပြေးဆွဲခွင့် ပိတ်ထားပါတယ်။ ကိုဗစ်တတိယလှိုင်းတုန်းက ကူးစက်သူနဲ့ သေဆုံးသူ အများအပြားရှိခဲ့တဲ့ ကလေးမြို့ရဲ့ အခုလက်ရှိ ကိုဗစ်ဖြစ်ပွားမှု အခြေအနေကရော ဘယ်လိုရှိနေပါသလဲ။

ကိုဗစ်မျိုးရိုးဗီဇပြောင်း Omicron တွေ့ရှိတဲ့ နိုင်ငံတွေထဲမှာ အိန္ဒိယနိုင်ငံလည်း ပါဝင်လာလို့ မြန်မာ-အိန္ဒိယ နယ်စပ်ဒေသက ခရီးသွားတွေ လိုက်ပါစီးနင်းတတ်တဲ့ ကလေးမြို့က ပြည်တွင်းလေကြောင်းလိုင်း ခရီးစဉ်တွေကို ယာယီရပ်ဆိုင်းတယ်လို့ ဒီဇင်ဘာ ၅ ရက် ရက်စွဲနဲ့ လေကြောင်းပို့ဆောင်ရေး ညွှန်ကြားမှု ဦးစီးဌာနက ထုတ်ပြန်ထားပါတယ်။ ကလေးမြို့ လေကြောင်းခရီးစဉ်တွေကနေ တဆင့် ရောဂါပိုး ဝင်ရောက်မှာကို ထိန်းချုပ်နိုင်ဖို့အတွက် ကျန်းမာရေးဝန်ကြီးဌာနက ညှိနှိုင်းလာလို့ ဖြစ်တယ်လို့ ထုတ်ပြန်ချက်မှာ ရေးထားပါတယ်။
စစ်အာဏာသိမ်းပြီးနောက်ပိုင်း နိုင်ငံရေး အခြေအနေတွေကြောင့် ကလေးမြို့က ကုန်းလမ်းသွားလာရေး လမ်းကြောင်းတွေက ခက်ခဲနေချိန် လေကြောင်းလိုင်းကိုသာ အဓိက အားထားနေရတာမို့ အခုလို ညွှန်ကြားချက် ထုတ်လိုက်တာဟာ မဖြစ်မနေ ကိစ္စမျိုးတွေအတွက် သွားလာဖို့ လိုသူတွေအတွက် ခက်ခဲသွားနိုင်တယ်လို့ ကလေးမြို့ ကိုဗစ်တိုက်ဖျက်ရေး တာဝန်ရှိသူတဦးက ပြောပါတယ်။
"နိုင်ငံရေးအခြေအနေတွေလည်း မငြိမ်သက်တာကြောင့်မို့လို့ မသွားရတဲ့ ခရီးတွေလည်း ရှိတယ်။ လေကြောင်းပိတ်လိုက်တာကတော့ ကလေးမြို့မှာ အဆက်အသွယ် အကောင်းဆုံးဆိုလို့ လေကြောင်းပဲ ရှိတော့တာလေ။ ကားလမ်းတွေကလည်း ဆက်သွယ်ရေးက သွားလာရတာ ခက်ခဲသွားပြီလေ။ အဲဒါကို ပိတ်လိုက်တာကတော့ ခရီးသွားလာရေးကတော့ နည်းနည်းတော့ ခက်ခဲသွားတာပေါ့။ Omicron က WHO ကလည်း အလေးထားတယ်။ နောက်ပြီးတော့ ကျယ်ကျယ်ပြန့်ပြန့်လည်း ဖြစ်လည်း ဖြစ်လာနေပြီ။ ကျနော်တို့ဒေသကိုလည်း ဒီပိုးက ရောက်လာဦးမယ့် သဘောပဲ။ ရောက်လာလို့ရှိရင်လည်း ကျနော်တို့အနေနဲ့ ကြိုတင်ကာကွယ်ရေးတွေပေါ့နော်၊ ထိန်းချုပ်တာတော့ မထိန်းချုပ်နိုင်ဘူး၊ ဒီတိုင်းပဲ ပြန့်ဦးမှာပဲ။ ပြန့်လို့ရှိရင် ဘယ်လိုတုံ့ပြန်မယ် ဆိုတာနဲ့ပဲ သွားရမယ်ထင်တာပေါ့နော်။ ကုသရေးနဲ့ပဲ သွားရမှာပေါ့ဗျာ၊ ကာကွယ်ရေးနဲ့တော့ မသွားနိုင်ဘူးထင်တာပဲ။"
မြန်မာနိုင်ငံမှာ ကျယ်ကျယ်ပြန့်ပြန့် ကူးစက်ဖြစ်ပွားခဲ့တဲ့ ကိုဗစ်တတိယလှိုင်းတုန်းက ကလေးမြို့မှာ ရောဂါပိုး ကူးစက်ခံရသူနဲ့ သေဆုံးသူ အများအပြား ရှိခဲ့ပါတယ်။ ကိုဗစ်ကပ်ရောဂါကြောင့် သေဆုံးသူဦးရေက တရားဝင်ထုတ်ပြန်ထားတဲ့ ကိန်းဂဏန်းတွေမှာ ရာဂဏန်းလောက်သာ ရှိခဲ့ပေမယ့် လက်တွေ့မြေပြင်မှာ ဆောင်ရွက်ခဲ့သူတွေရဲ့ ကိန်းဂဏန်းအရ ဆိုရင်တော့ ၁,၃၀၀ ဝန်းကျင်ထိ ရှိပါတယ်။ အခု ကိုဗစ်မျိုးသစ် Omicron ရှိနေပြီဆိုတာ ပြည်သူတွေ သိထားပေမယ့် ကြိုတင်ကာကွယ်ရေးပိုင်း အလေးထား လိုက်နာတာမျိုး သိပ်မတေ့ွရဘူးလို့ ကလေးမြို့ ကိုဗစ်တိုက်ဖျက်ရေးမှာ ပါဝင်ခဲ့သူက ပြောပါတယ်။
"ကလေးမြို့မှာ ကိုဗစ်နဲ့ ပတ်သက်ပြီးတော့ အခြေအနေက တော်တော်လေးတော့ ငြိမ်သွားပါတယ်။ ကာကွယ်ထိန်းချုပ်မှု အပိုင်းတွေကတော့ Mask တပ်တဲ့နှုန်းက ၁၅ ရာခိုင်နှုန်း၊ ၂၀ ရာခိုင်နှုန်းလောက်ပဲ ရှိတော့တာ။ ပြီးတော့ အခုမျိုးကွဲပေါ်တယ်၊ ဘာညာတော့ ကြားတာပေါ့နော်။ အဲဒါကို ပြည်သူတွေအနေနဲ့လည်း တော်တော်များများ သိကြတယ်။ ဒါပေမယ့် သူတို့ သိပ်ကြောက်တဲ့ပုံလည်း မပေါ်တော့ဘူး။ အဲလို ကြိုတင်ပြင်ဆင်မှု ဘာညာလည်း မတွေ့ရဘူး။"
မြန်မာနိုင်ငံနဲ့ နယ်နိမိတ်ချင်းဆက်နေတဲ့ အိန္ဒိယနဲ့ ထိုင်းနိုင်ငံတို့မှာ Omicron ကိုဗစ်မျိုးသစ် ကူးစက်သူတွေ ရှိနေပြီလို့ သက်ဆိုင်ရာ ကျန်းမာရေးဌာနတွေက ထုတ်ပြန်ထားပါတယ်။ မြန်မာနိုင်ငံမှာတော့ ဗီဇပြောင်းပိုးသစ်ကူးသူ ရှိတယ်ဆိုတဲ့သတင်း မကြားရသေးပါဘူး။ ပိုးသစ်ကို ကာကွယ်နိုင်ဖို့ လူချင်းခပ်ခွာခွာနေဖို့၊ နှာခေါင်စည်းတပ်ဖို့ စတဲ့ သတိပေးမှုတွေကိုတော့ ကျန်းမာရေးဌာနက ထုတ်ပြန်နေပါတယ်။ ကိုဗစ်ကပ်ရောဂါ ကာကွယ်ဆေးထိုးတဲ့ အစီအစဉ်တွေကိုလည်း တနိုင်ငံလုံး အတိုင်းအတာနဲ့ လုပ်နေပါတယ်။ ကျန်းမာရေးဌာနရဲ့ ကိုဗစ်ကာကွယ်ဆေးထိုး အစီအစဉ်အရ တချို့နေရာတွေမှာ လွယ်လွယ်ကူကူ ဆေးထိုးနိုင်ကြသူတွေရှိသလို တချို့နေရာတွေမှာတော့ ဆေးထိုးဖို့ စောင့်ဆိုင်းနေကြရသူတွေလည်း ရှိနေပါတယ်။
ကလေးမြို့မှာနေထိုင်သူ တချို့ကတော့ အိန္ဒိယကနေ ကာကွယ်ဆေးလှမ်းမှာပြီး ကိုယ့်အစီအစဉ်နဲ့ကိုယ် ထိုးနှံတာတွေလည်း ရှိတယ်လို့ ကလေးမြို့ ဒေသခံတဦးက ပြောပါတယ်။
"ကာကွယ်ဆေးထိုးတာတွေက တချို့ ကျန်းမာရေး စိုးရိမ်တဲ့လူကတော့ ကိုယ့်ဟာနဲ့ကိုယ် အိန္ဒိယဘက်ကနေလာတဲ့ တချို့ဆေးတွေပေါ့နော်၊ တခါထိုးရင် ၅၀,၀၀၀ နဲ့ ထိုးကြတာတွေလည်း ရှိတယ်။ တခြားလူတွေကတော့ သူတို့ထိုးပေးတဲ့ဆေးကို သွားထိုးတာတွေလည်း ရှိတယ်။ သူတို့က ဘာယူလဲဆိုတော့ အိမ်ထောင်စုမိတ္တူတို့၊ မှတ်ပုံတင်မိတ္တူတို့ ပေးရတယ်ပေါ့။ အချက်အလက်တွေ ပေးရတယ်။ အဲတော့ သူတို့နဲ့ မပူးပေါင်းချင်တဲ့လူကတော့ သူတို့ ကိုဗစ်ဆေးတွေကို သွားမထိုးဘူး။ ဆေးလာထိုးကြတာက ရွာပိုင်းတွေက ပိုများတယ်။ တော်တော်များများက ကားတွေအပြည့်နဲ့ လာကြတယ်။ ပြီးခဲ့တဲ့ ရက်တွေကတော့ မိုးရွာနေလို့၊ အဲဒီမတိုင်ခင် အရင်ရက်တွေကတော့ ကားအစီးလိုက် သွားထိုးကြတာတွေ တွေ့တယ်။ ကလေးမြို့ တောင်ပိုင်းဘက်က လာတာတွေက ပိုများတာပေါ့။"
Omicron ကိုဗစ်ပိုးသစ် နိုင်ငံထဲ ဝင်ရောက်မလာနိုင်အောင် နိုင်ငံတကာ ဝင်ပေါက်တွေနဲ့ နယ်စပ်ဒေသတွေမှာ လူဝင်လူထွက် စစ်ဆေးတာ၊ ဓာတ်ခွဲစစ်ဆေးတာတွေကို ဆောင်ရွက်သွားမယ်လို့ ကျန်းမာရေးဌာန ပြောခွင့်ရ ဒေါက်တာသန်းနိုင်စိုးက ဗွီအိုအေနဲ့ အင်တာဗျူးမှာ ဖြေထားပါတယ်။ အခု အိန္ဒိယနယ်စပ်ဒေသ ကလေးမြို့က ပြည်တွင်းလေကြောင်း ခရီးစဉ်တွေကို ယာယီပိတ်လိုက်တာဟာ ကိုဗစ်ပိုးသစ်နဲ့ပတ်သက်လို့ ပြည်တွင်းမှာ ပထမဆုံး ဆောင်ရွက်တာလို့ ပြောလို့ရပေမယ့် တနိုင်ငံလုံး အတိုင်းအတာနဲ့ ပိုပြီး တင်းတင်းကျပ်ကျပ် လုပ်သင့်တယ်လို့ ဝေဖန်ထောက်ပြတာတွေလည်း ရှိနေပါတယ်။
ဗီဇပြောင်း Omicron ကိုဗစ်ပိုးသစ်နဲ့ ပတ်သက်လို့ သိပ္ပံပညာရှင်တွေက အတိအကျသိနိုင်အောင် ကြိုးစားနေချိန်မှာ ကိုဗစ်ကာကွယ်ဆေး ထိုးကြဖို့နဲ့ အားဖြည့် ကိုဗစ်ကာကွယ်ဆေး ထိုးကြဖို့ ကျန်းမာရေး ပညာရှင်တွေက တိုက်တွန်းထားပါတယ်။ မြန်မာနိုင်ငံမှာတော့ ကိုဗစ်ကာကွယ်ဆေး အကြိမ်ပြည့် ထိုးနှံပြီးသူ ၁၁ သန်းကျော် ရှိတယ်လို့ ကျန်းမာရေးဝန်ကြီးဌာနက ထုတ်ပြန်ထားပါတယ်။

ဗီအိုအေ

Read times
Rate this item
(0 votes)