ရခိုင်ပြည်နယ်ရှိ ကုလားတန် ဘက်စုံသယ်ယူပို့ဆောင်ရေး စီမံကိန်းတွင် ပါဝင်သည့် စစ်တွေဆိပ်ကမ်းကို မြန်မာ့ပို့ဆောင်ရေးနှင့် ဆက်သွယ်ရေးဝန်ကြီးဌာနနှင့် အိန္ဒိယ ဆိပ်ကမ်းများ၊ ကုန်စည်သယ်ယူပို့ဆောင်ရေးနှင့် ရေကြောင်းပို့ဆောင်ရေး ဝန်ကြီးဌာနတို့မှ ပူးတွဲ၍ မေလ (၉) ရက်နေ့တွင် ဖွင့်လှစ်လိုက်ပြီ ဖြစ်သည်။
အဆိုပါ စီမံကိန်းကို ၂၀၀၈ ခုနှစ်တွင် ပထမဆုံး အတည်ပြုခဲ့ပြီးနောက် လုပ်ငန်းဆောင်ရွက်ခဲ့သည်မှာ (၁၅) နှစ် ကြာမြင့်ခဲ့ပြီ ဖြစ်ကာ ယခုမှသာ ကုလားတန်မြစ်ကြောင်း ဘက်စုံသုံး ဖြတ်သန်း သယ်ယူပို့ဆောင်ရေး စီမံကိန်း၏ အစိတ်အပိုင်းတစ်ခု ဖြစ်သော ရေလမ်းကြောင်းကို စတင် ဖွင့်လှစ်နိုင်ခဲ့ခြင်း ဖြစ်သည်။
ယင်း ကုလားတန်မြစ်ကြောင်း ဘက်စုံသုံး ဖြတ်သန်း သယ်ယူပို့ဆောင်ရေး စီမံကိန်းသည် အိန္ဒိယ- မြန်မာ နှစ်နိုင်ငံအကြား ကုန်သွယ်မှုနှင့် ကူးသန်းရောင်းဝယ်ရေးကို မြှင့်တင်ရန်အတွက်သာမကပဲ အပြည်ပြည်ဆိုင်ရာ ဆိပ်ကမ်းများ ပေါ်ပေါက်လာကာ အခြားသော အရှေ့တောင်အာရှနိုင်ငံများနှင့်ပါ တိုက်ရိုက် ကုန်သွယ်နိုင်ရန် ရည်ရွယ်ထားခြင်း ဖြစ်သည်။
ဆိပ်ကမ်းဖွင့်ပွဲ အခမ်းအနားတွင် ရခိုင် ကုန်သည်/ စက်မှုအသင်း RSCCI မှ
- နှစ်နိုင်ငံအကြား ကုန်သွယ်မှုအတွက် ငွေကြေးပေးချေမှုများနှင့် နိုင်ငံခြားငွေသုံးစွဲမှု အဆင်ပြေစေရေး
- စစ်တွေဆိပ်ကမ်းကို အခြေပြုတင်ပို့သော မြန်မာ့ပို့ကုန်များအတွက် အခွန်အကောက် လျှော့ပေါ့ သက်သာခွင့် ရရှိရေး
- စစ်တွေ-ကလကတ္တား ပုံမှန်ပြေးဆွဲပေးနိုင်မည့် သင်္ဘောလိုင်း သတ်မှတ်ထားရှိပေးရေး ကိစ္စတို့ကို တင်ပြ ဆွေးနွေးခဲ့ပြီး
ရခိုင်ပြည်နယ် ကမ်းရိုးတမ်းသင်္ဘောပိုင်ရှင်များ အသင်းမှ
- စစ်တွေ ဆိပ်ကမ်းသစ်၌ ဆိပ်ကမ်းအသုံးပြုခများကို မြန်မာကျပ်ငွေစနစ်ဖြင့် ဆောင်ရွက်ခွင့် ရရှိရေး
- ပြည်တွင်းရေကြောင်း သယ်ယူပို့ဆောင်ရေး လုပ်ငန်းများ ( စစ်တွေ- ပလက်ဝမြစ်ကြောင်း သယ်ယူပို့ဆောင်ရေးနှင့် စစ်တွေ-ရန်ကုန် ကမ်းရိုးတမ်းသွား ပို့ဆောင်ရေး ) တွင် ပါဝင်ခွင့်ရရှိရေး
- ဒေသခံ လုပ်ငန်းရှင်များ၏ သင်္ဘောများ ပါဝင်ပြေးဆွဲခွင့် ဖော်ဆောင်ရေးတို့အတွက် တင်ပြ ဆွေးနွေးခဲ့ကြကြောင်း သိရသည်။
ပထမဆုံးအနေဖြင့် အိန္ဒိယနိုင်ငံရှိ ကာလကတ္တားမှ မြန်မာနိုင်ငံရှိ စစ်တွေဆိပ်ကမ်းသို့ ကုန်စည်ပို့ဆောင်မှုဖြင့် ကုန်သွယ်မှု စတင် လည်ပတ်မည် ဖြစ်ပြီး ပြီးခဲ့သည့်လက ဆန်တင်သင်္ဘောတစ်စင်းကို စစ်တွေဆိပ်ကမ်းမှ ဘင်္ဂလားဒေ့ရှ်နိုင်ငံသို့ စမ်းသပ် မောင်းနှင်စေခဲ့ပြီး ဖြစ်ကြောင်း သိရသည်။
Advertisement
Click Here > Hmwe
စစ်တွေဆိပ်ကမ်းကို ၂၀၁၈ ခုနှစ်တွင် တည်ဆောက် ပြီးစီးခဲ့သော်လည်း မြန်မာနိုင်ငံတွင်း လှုပ်ခတ်နေသည့် နိုင်ငံရေးအခြေအနေများ အထူးသဖြင့် ချင်းပြည်နယ်နှင့် ရခိုင်ပြည်နယ်တွင် ဖြစ်ပေါ်နေသော ပဍိပက္ခ အခြေအနေများကြောင့် စီမံကိန်းလုပ်ငန်း လည်ပတ်ရန်အတွက် လိုအပ်သော လိုင်စင်နှင့် ခွင့်ပြုချက်များ ရရှိမှု ကြန့်ကြာခဲ့သည်ဟု ဆိုသည်။
စစ်တွေရေနက်ဆိပ်ကမ်းကို ဘိလပ်မြေ၊ ပဲမျိုးစုံနှင့် အစားအစာ၊ အစေ့အဆန်များ ကဲ့သို့သော ကုန်စည်များအား ကုန်သွယ်ရန်အတွက် အဓိကထား အသုံးပြုမည် ဖြစ်ပြီး နောက်ထပ် ဆိပ်ကမ်းတစ်ခုဖြစ်သည့် ပလက်ဝဆိပ်ကမ်းအားလည်း တည်ဆောက်ပြီးပြီ ဖြစ်ကြောင်း Inland Waterways Authority of India ( IWAI ) မှ တာဝန်ရှိသူတစ်ဦးက ပြောသည်။
ကုလားတန်မြစ်သည် အိန္ဒိယနိုင်ငံနှင့် ချင်းပြည်နယ် တောင်တန်းများမှတစ်ဆင့် ရခိုင်ပြည်နယ်သို့ ဖြတ်သန်း စီးဆင်းနေသည့် မြစ်တစ်စင်းဖြစ်ပြီး ကုလားတန်မြစ်ဆိုသည့် အခေါ်မှာ ဒေသအသုံးအနှုန်း ဖြစ်ကာ စာပေတွင် ကစ္ဆပနဒီမြစ်ဟု ခေါ်ဆိုကြသည်။
ယခုအခါ စီမံကိန်းနှင့် ပတ်သက်၍ ရုံးအဆောက်အအုံများ၊ စက်ယန္တရားများနှင့် မြစ်တွင်းသွား သယ်ယူပို့ဆောင်ရေးယာဉ်များ ရှိနေပြီ ဖြစ်သည့်အပြင် ပလက်ဝပြည်တွင်းရေကြောင်း ဆိပ်ကမ်းတို့ကို တည်ဆောက်ထားပြီး အပြည်ပြည်ဆိုင်ရာ အကောက်ခွန်ဆိပ်ကမ်း အဖြစ်လည်း သတ်မှတ် ဆောင်ရွက်မည်ဟု သိရသည်။
ပလက်ဝမြို့မှ အိန္ဒိယ-မြန်မာ နှစ်နိုင်ငံနယ်စပ်တွင် ရှိသည့် မီဇိုရမ်ပြည်နယ် ဇိုရင်ပူမြို့သို့ ဆက်သွယ်မည့် အဝေးပြေးကားလမ်းကိုလည်း ဖောက်လုပ်ရန် ဆောင်ရွက်လျက် ရှိပြီး အဆိုပါ အဝေးပြေးကားလမ်းသည် ကီလိုမီတာ ၁၁၀ ရှည်လျားသည်။
ကုလားတန်မြစ်ကြောင်း ဘက်စုံသုံး ဖြတ်သန်း သယ်ယူပို့ဆောင်ရေး စီမံကိန်းတစ်ခုလုံး ပြီးစီးပါက မြန်မာနိုင်ငံသာမက အိန္ဒိယနိုင်ငံ၏ ပြည်နယ်ဖွံ့ဖြိုးရေးနှင့် နိုင်ငံ့စီးပွားဖွံ့ဖြိုး တိုးတက်ရေးအတွက် များစွာ အထောက်အကူပြုနိုင်မည် ဖြစ်သည်။
