Knowledge

စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ပို့ကုန်သွင်းကုန်ဥပဒေ ပုဒ်မ ၄ ပုဒ်မခွဲ (ဂ) နှင့် ပုဒ်မ ၁၃ ပုဒ်မခွဲ (ခ) အရ သွင်းကုန်လိုင်စင်နှင့် ပို့ကုန်လိုင်စင် လျှောက်ထားရန် လိုအပ်သော ကုန်စည်လိုင်းများကို မတ်လ (၃၁) ရက်နေ့က သတ်မှတ် ထုတ်ပြန်ခဲ့သည်။

သွင်းကုန်လိုင်စင် လျှောက်ထားရမည့် ကုန်စည်လိုင်းပေါင်း (၈,၇၇၄) လိုင်း ပါဝင်ပြီး ပို့ကုန်လိုင်စင် လျှောက်ထားရန် လိုအပ်သည့် ကုန်စည်လိုင်း (၁,၅၅၆) လိုင်းရှိကာ စုစုပေါင်း ကုန်စည်လိုင်း (၁၀,၃၃၀) ခု ရှိသည်။ 

အောက်တွင် ဖော်ပြထားသည့် ကုန်စည်လိုင်းများပါ ကုန်ပစ္စည်းတစ်ရပ်ရပ်ကို တင်သွင်းခြင်း (သို့မဟုတ်) တင်ပို့ခြင်းနှင့် စပ်လျဉ်း၍ သတ်မှတ်လုပ်ထုံးလုပ်နည်းများနှင့်အညီ သွင်းကုန်လိုင်စင် (သို့မဟုတ်) ပို့ကုန်လိုင်စင် ဦးစွာ လျှောက်ထားပြီးမှ စိစစ် ခွင့်ပြုသည့်စနစ် (Non- Automatic Licensing) ဖြင့်သာ တင်သွင်း/ တင်ပို့ခွင့် ပြုတော့မည် ဖြစ်သည်။

အဆိုပါ အမိန့်ကြော်ငြာစာသည် ၂၀၂၃ ခုနှစ်၊ ဧပြီလ ၁ ရက်နေ့မှ စတင် အကျိုးသက်ရောက်မည် ဖြစ်ပြီး သတ်မှတ်ထားသည့် လိုအပ်သော လိုင်စင်များ လျှောက်ထားပြီးပါက နိုင်ငံတော်အတွင်းသို့ ကုန်းကြောင်း၊ ရေကြောင်း၊ လေကြောင်းတို့မှ တင်သွင်းခွင့်ပြုမည်ဟု သိရသည်။

Advertisement

Click Here > Super Apollo

သွင်းကုန်လိုင်စင် လျှောက်ရန် လိုသည့် ကုန်စည်လိုင်းများ

====================================

မြန်မာ့အကောက်ခွန်နှုန်းစာရင်း ၂၀၂၂ အရ H.S Code 10 Digit ဖြင့် ကုန်စည်လိုင်း (၈,၇၇၄) လိုင်းအား သွင်းကုန်လိုင်စင် လျှောက်ထားရန် လိုသော ကုန်စည်စာရင်းအဖြစ် သတ်မှတ်ခဲ့ပြီး ကုန်စည်များစာရင်းကို အောက်တွင် ကြည့်ရှုနိုင်သည်။

>  https://bit.ly/3ZBeYyd

ပို့ကုန်လိုင်စင် လျှောက်ရန် လိုသည့် ကုန်စည်လိုင်းများ

===================================

ပို့ကုန်လိုင်စင်လျှောက်ထားရန် လိုသော ကုန်စည်စာရင်းများအဖြစ် မြန်မာ့အကောက်ခွန်နှုန်းစာရင်း ၂၀၂၂ အရ H.S Code 10 Digit ဖြင့် ကုန်စည်လိုင်း (၁,၅၅၆) လိုင်းအား သတ်မှတ် ထုတ်ပြန်ထားပြီး စာရင်းအသေးစိတ်ကို အောက်တွင် ကြည့်ရှုနိုင်သည်။

> https://bit.ly/3KaV6w3

ယခင်  ပြည်ပမှ တင်သွင်းသည့် ကုန်စည်လိုင်းများနှင့်စပ်လျဉ်း၍ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက ထုတ်ပြန်ခဲ့သည့် ၂၀၂၂ ခုနှစ်၊ မေလ ၂ ရက်နေ့ ရက်စွဲပါ အမိန့်ကြော်ငြာစာအမှတ် (၃၂/၂၀၂၂) ကို ယခု အမိန့်ကြော်ငြာစာဖြင့် လွှမ်းမိုး ပယ်ဖျက်လိုက်ကြောင်း သိရသည်။

ပြည်ပနိုင်ငံများမှ တိရစ္ဆာန်သုံးဆေးဝါး၊ တိရစ္ဆာန်သုံးပစ္စည်းများ တင်သွင်းလိုသည့် လုပ်ငန်းရှင်များအတွက် တင်သွင်းခွင့် လျှောက်ထားရာတွင် လိုအပ်သည့် စာရွက်စာတမ်းများ၊ လျှောက်ထားရန် အဆင့်များ၊ ဝန်ဆောင်ခများနှင့် ဆက်သွယ်ရန် လိပ်စာ၊ ဖုန်းနံပါတ်များကို ဖော်ပြလိုက်ပါသည်။

ဝန်ဆောင်မှုရယူရန် အခြေခံလိုအပ်ချက်များ

• ဦးစီးဌာနမှ သတ်မှတ်ထားသည့် စာရွက်စာတမ်းများ ပြည့်စုံပါက လျှောက်ထားနိုင်သည်။
• တင်သွင်းမည့် နမူနာပစ္စည်းများကို ဦးစီးဌာန၊ တိရစ္ဆာန်အစာနှင့် ဆေးဝါးအရည်အသွေး စစ်ဆေးရေး ဓာတ်ခွဲခန်း (Veterinary Assay Laboratory) သို့ ပေးပို့ စစ်ဆေးခြင်းနှင့် အရည်အသွေး ပြည့်မီကြောင်း ဓာတ်ခွဲခန်းစစ်ဆေးချက် အဖြေရရှိမှသာ လျှောက်ထား ခွင့်ပြုမည် ဖြစ်သည်။
• စစ်ဆေးရန် ကြိုတင်ပေးပို့ထားသည့် နမူနာဆေးဝါးနှင့် အမှန်တကယ် တင်သွင်း ရောက်ရှိသည့် ဆေးဝါးများသည် စံချိန်စံညွှန်း ကိုက်ညီမှု ရှိရမည်။
• တိရစ္ဆာန်သုံးပစ္စည်း တင်သွင်းခြင်း ဖြစ်ပါက တင်သွင်းရန် လျှောက်ထားသည့် ပစ္စည်းနှင့် အမှန်တကယ် တင်သွင်းရောက်ရှိသည့် ပစ္စည်းများသည် အမျိုးအစားနှင့် အရေအတွက် ကိုက်ညီမှု ရှိရမည်။

လိုအပ်သောစာရွက်စာတမ်းများ

• ဦးစီးဌာန၏ စည်းမျဉ်းစည်းကမ်းများကို သိရှိလိုက်နာမည် ဖြစ်ကြောင်း ကတိခံဝန်ချက်၊
• ကုန်ပစ္စည်းအမှာလွှာ (Proforma Invoice)၊
• အရောင်းအဝယ် သဘောတူစာချုပ် (Sales contract) မိတ္တူ၊
• ကာကွယ်ဆေးများ၏ Catalogue၊
• အရည်အသွေး စစ်ဆေးမှုဆိုင်ရာ ထောက်ခံချက် (Certificate of Analysis-CoA)၊
• လွတ်လပ်စွာ ရောင်းချခွင့်လက်မှတ် (Free Sale Certificate)၊
• ကုန်ပစ္စည်းရောင်းချသည့် နိုင်ငံ၏ ထုတ်လုပ်သည့် စက်ရုံသည် HACCP or GMP Certificate သို့မဟုတ် ယင်းနှင့် အလားတူညီသော ဘေးဥပါဒ်အန္တရာယ်ကင်းရှင်းမှုဆိုင်ရာ အထောက်အထား၊
• အဆိုပါစက်ရုံ၏ တရားဝင်ဝက်(ဘ်)ဆိုဒ် (URL) နှင့် လိပ်စာ၊
• တင်သွင်းမည့် ဆေးဝါး၏ နမူနာစစ်ဆေးခြင်းအတွက် ဦးစီးဌာန၏ သက်တမ်းရှိ ဓာတ်ခွဲခန်း အဖြေမိတ္တူ။

     Advertisement

Click Here > United Pacific

လျှောက်ထားရန်အဆင့်များ

• သတ်မှတ်ထားသော လျှောက်လွှာပုံစံဖြင့် ဦးစီးဌာနသို့ ကျန်းမာရေးဆိုင်ရာ သဘောထားမှတ်ချက် လျှောက်ထားခြင်း၊
• တင်သွင်းမည့် တိရစ္ဆာန်သုံးဆေးဝါးများ ပြည်တွင်းသို့ မရောက်ရှိမီ အနည်းဆုံး (၃) ရက် ကြိုတင်၍ ဦးစီးဌာနသို့ အကြောင်းကြားခြင်း၊
• စစ်ဆေးရေးစခန်းသို့ တိရစ္ဆာန်သုံးဆေးဝါးများ ရောက်ရှိချိန်တွင် မျက်မြင်စစ်ဆေးမှု ခံယူခြင်း၊ အရည်အသွေး စစ်ဆေးမှုဆိုင်ရာ ထောက်ခံချက် (certificate of analysis) မူရင်းကို စစ်ဆေးမှု ခံယူခြင်းနှင့် အခြားသက်ဆိုင်ရာ အထောက်အထားများ စစ်ဆေးမှု ခံယူခြင်း၊
• တိရစ္ဆာန်သုံးဆေးဝါးဖြစ်ပါက စစ်ဆေးရေးစခန်းသို့ တင်သွင်းပစ္စည်းများ ရောက်ရှိချိန်တွင် လျှောက်ထားပစ္စည်းနှင့် ရောက်ရှိလာသည့်ပစ္စည်း ကိုက်ညီမှု ရှိမရှိ မျက်မြင်စစ်ဆေးမှု ခံယူခြင်းနှင့် အခြားသက်ဆိုင်ရာ အထောက်အထားများ စစ်ဆေးမှု ခံယူခြင်း
• မြန်မာနိုင်ငံ ကုန်ပစ္စည်းအလိုအလျောက် စစ်ဆေးရေးစနစ် [Myanmar Automated Cargo Clearance System (MACCS)] ၏ မွေးမြူရေးကဏ္ဍ [Livestock Sector (LS)] တွင် ဝင်ရောက် လျှောက်ထားခြင်း၊
• တင်သွင်းပစ္စည်း မှန်ကန်ကြောင်း စစ်ဆေးခြင်းပုံစံဖြင့် မြန်မာနိုင်ငံ ကုန်ပစ္စည်း အလိုအလျောက် စစ်ဆေးရေးစနစ် [Myanmar Automated Cargo Clearance System (MACCS)] တွင် အတည်ပြုချက် ရယူခြင်း တို့ကို ဆောင်ရွက်ရမည် ဖြစ်သည်။

ဝန်ဆောင်ခ

သတ်မှတ်ထားသော ဓာတ်ခွဲခန်းစစ်ဆေးခများ ပေးဆောင်ရမည် ဖြစ်သည်။

ဆက်သွယ်ရမည့်လိပ်စာ

ပြည်သူ့ဝန်ဆောင်မှုရုံး (OSS)၊ မွေးမြူရေးနှင့် ကုသရေးဦးစီးဌာန (ရုံးချုပ်)၊ နေပြည်တော်။ 

ဖုန်းနံပါတ် - ၀၆၇၃၄၁၈၄၅၈

ရုံးအမှတ်(၃၆)၊ မွေးမြူရေးနှင့် ကုသရေးဦးစီးဌာန၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ပဏ္ဍိတလမ်း၊ ဥတ္တရသီရိမြို့နယ်၊ နေပြည်တော်။